منسیزله میشم(mənsizləmişəm)
بیر گویرچین کیمی دنسیزله میشم
بولبولم , یازدا چمنسیزله میشم
اسکی دن شانلی شرفلی ائل ایدیم
ظالمه قارشی آمانسیز سئل ایدیم
ذیروه سی چنلی , دومانلی بئل ایدیم
ایندی , مدتی کی , چنسیزله میشم
منده اردئملی ارنلر یاشامیش
ستارا , بابکه تنلر یاشامیش
او قدر ائلجه بیلنلر یاشامیش
ایندی من ارسیز ارنسیزله میشم
دردیمین یوخ آدی ,عنوانی دئسم
حیرته دالدیرار انسانی , دئسم
باشقا بو سوزله معنانی دئسم
اوز دیاریمدا وطن سیزله میشم
درد منی یاندیریر , آما اودو یوخ
اودور, آغزیمدا حیاتین دادی یوخ
دئمیرم دردلر ایچینده آدی یوخ
دئیرم : من بئله منسیزله میشم
ای منیم منلیگیم , امدادیما یئت!
بیرجه گل, منله قووش, دادیما یئت!
منی باس باغرینا, فریادیما یئت!
بیلمیسن کی , نئجه سنسیزله میشم
ّّ کریم مشروطه چی
+ نوشته شده در جمعه سی ام بهمن ۱۳۸۸ ساعت 12:2 توسط امین کلخورانی خیاوی
|